Na ndiqni

Aktuale

Thaçi e Hoxhaj i reagojnë Lajçakut që doli kundër idesë së shkëmbimit të territoreve

Më: 5 janar 2019 Në ora: 17:42
Hashim Thaçi dhe Mirsollav Lajçak

Ministri i Punëve të Jashtme i Sllovakisë, Mirsollav Lajçak, është shprehur kundër idesë së shfaqur për shkëmbim të territoreve si zgjidhje e mundshme e çështjes mes Kosovës dhe Serbisë.

Në një intervistë për agjencinë serbe të lajmeve “Tanjug”, Lajçak ka thënë me bindje të plotë se dialogu është e vetmja mënyrë për të zgjidhur problemin e Kosovës.

“Sllovakia nuk e mbështetë idenë e shkëmbimit të territoreve dhe shënimit të vijave kufitare përgjatë vijave etnike. Besojmë se një koncept i tillë nuk ishte real dje, sot duket se është, por nesër sërish nuk do të jetë”, ka thënë ministri sllovak.

Por, ndaj këtyre deklaratave kanë reaguar liderë institucionalë të Kosovës. I pari ishte zëvendëskryeministri Enver Hoxhaj, e pas tij edhe presidenti i vendit, Hashim Thaçi.

Hoxhaj, në një postim në Twitter, iu drejtua Lajçakut duke thënë se opinioni i Sllovakisë për Kosovën dhe rajonin do të ishte shumë më kredibil nëse ky shtet do ta kishte mbështetur propozimin e OKB-së për pavarësi dhe ta kishte njohur Kosovën siç bënë 23 shtetet tjera anëtare të BE-së.

Në vend se të predikojë, Hoxhaj tha se Sllovakia duhet të bëhet shembull me veprimet e veta.

“Miku im i dashur Mirosllav Lajçak, imagjino sa më shumë kredibilitet do të kishte opinion i Sllovakisë për Kosovën dhe për rajonin nëse shteti juaj do ta kishte mbështetur propozimin e Kombeve të Bashkuara për pavarësi dhe ta kishte njohur pavarësinë e Kosovës siç bënë edhe 23 shtete tjera anëtare të OKB-së”, ka shkruar Hoxhaj.

Ndërkaq, i ashpër në deklarim ishte edhe presidenti Thaçi, i cili vet e ka propozuar idenë e shkëmbimit të territoreve me Serbinë.

“I dashur ish-kolegu im Mirosllav Lajçak, ndihmo që Sllovakia ta njohë Kosovën së pari – ose së paku si kryesues i OSBE-së, na lejo të kemi zë në OSBE në Vjenë – para se të jepni këshillë kaq bujare për Kosovën. Pavarësia jonë, ushtria jonë dhe barazia jonë në Evropë janë të panegociueshme”, ka shkruar Thaçi në Twitter.

Komentet
Sondazh A mendoni se qytetarët e Kosovës do të lëvizin pa viza këtë vit?
test